Blekkingarleikur

.................við viljum algera uppstokkun.  Annað dugir ekki til að skapa traust.  Það er nú brandari ef skipta á Þórunni út. Sennilega með heiðarlegri ráðherrum og ekki talin tengjast spillingu. Henni verður kannski hegnt fyrir að taka undir með almenningi að rétt sé að kjósa?

Þetta mun engu breyta um kröfur almennings um að fá að kjósa nýtt  fólk í nýja ríkisstjórn.

Uppstokkun fyrir áramót

FLÓTTAFÓLK

........Fólk flýr landið.  þúsundir geta ekki framfleytt sér og sínum fjölskyldum.  Ríkisvaldið eykur álögur á fólk og stuðlar þannig að frekari flótta.  Ekkert er gert til að koma fólki til bjargar. Ekkert.

En enginn axlar ábyrgð. Hvernig má það vera hægt?  Sukkið heldur áfram á öllum vígstöðvum.  Það hlýtur að vera til leið til að stöðva þetta.

Þetta getur bara endað með allsherjaruppreisn.

Íslendingar stefna til Noregs

Mér er kalt á tánum.

............DV.is segir að 1-2000 manns hafi mætt á Austurvöll.   Það mættu fleiri en ég gerði ráð fyrir í kuldanum. Og allir þögðu nema 2-3 karlar sem buðu smyglaðan bjór á spottprís.

Það var nefnilega þannig að það voru karlarnir sem gátu ekki þagað

Eftir fundinn fór ég og hlýjaði mér inni í Eymundsson.  Skoðaði nýju bækurnar við undirleik Tómasar R Einarssonar.  Skemmtileg stemning í búðinni.

Vekjaraklukka fyrir stjórnvöld

Afhverju 17 mínútur?

................ég ætla að mæta á morgun og þegja með hinum.   En afhverju 17 mínútur?  Afhverju ekki 15 eða 13?

En nú er stutt til jóla og fjölskyldufólk gefur sér ekki tíma til mótmæla.  Mætum úthvíld eftir áramót.  Mikið hroðalega er  leiðinlegt að vera svona reiður á aðventu.

Öflugt andóf boðað eftir jól

Við höfum um þrennt að velja.

Iceland Express, Icelandair eða Norrrænu.   Þetta  las ég á einhverju bloggi  um daginn.  Það er orðið ólíft á landinu.

Ég er orðin eiginlega jafnreið yfir því sem stjórnvöld gera og því sem þau ekki gera.  Traustið á þessari ríkisstjórn er lítið sem ekkert. Afhverju víkja þau ekki? 

Afhverju  er ekki miklu meira skorið niður í utanríkisþjónustunni?  Nú á áfengi að hækka   í þriðja sinn á stuttum tíma svo bruggarar og fíkniefnasalar hljóta að vera í skýjunum. Það er þó verið að gera vel við einhverja .

Mér er nóg boðið.

Blóðug fjárlög

Hvar er umboðsmaður almennings?

................Um leið og við lesum um að 260 manns missi vinnu á dag eru álögur auknar.  Tekjuskattur hækkaður.  Og afborganir af lánum á leið upp himnastigann.  Matvara og og öll önnur vara hækkar nánast daglega.  Laun flestra hafa lækkað því engin er yfirvinnan lengur.

Getur einhver sagt mér hvernig þetta á að ganga upp?

Atvinnulausum fjölgar um 260 á dag

Sko Kúta

...............flott hjá honum að sækja um styrkinn. Nú getur hann boðið innflytjendunum á Baukinn þar sem best er að ná sambandi við innfædda.   Annars sýnist mér á fréttinni að vinnubrögðin hafi verið til fyrirmyndar.   Eins og flest á henni Húsavík.    Annars heimsótti mig til Húsavíkur ónefndur sveitarstjóri eitthvert sumarið sem ég var að vinna fyrir norðan.  Ég sýndi honum helstu djásn staðarins.  Veðrið var eins og best verður á kosið.  Sól og norðlenskur sumarhiti. Við fengum okkur bjór á Gamla Bauk og hafnarsvæðið iðaði af mannlífi.  Sveitarstjórinn fullyrti að svona stemning finndist ekki annars staðar á Íslandi.  Á heimleiðinni grandskoðaði hann hvert hús.....til Húsavíkir vildi hann flytja.  Hann hefur reyndar ekki staðið við það.

Og nú trúi ég að Húsavík sé orðin jólalegri en aðrir bæir á Íslandi.

Hlutu rúmlega þriggja milljóna styrk

Björgvin er vaknaður

..............En er einhver von til að yfirvöld  í Lúxemburg samþykki þessa beiðni?

.............Ég held að BGS hafi vaknað á fundinum í Háskólabíói.  Þar sat hann fölur og fár.  Kannski gerði hann sér fyrst þá grein fyrir reiðinni í samfélaginu.  Undiraldan er gríðarlega þung.  En sannarlega vona ég að þetta takist hjá honum því mikið er í húfi.  Við einfaldlega getum ekki haldið áfram hér fyrr en við fáum allt upp á borðið.  Þá fyrst getum við byggt á rústunum.

Kaupþing í Lúx ekki selt nema gögnin fáist

Við borgum meira

..................Afhverju á ég að borga meira fyrir RUV til að aðrar sjónvarpsstöðvar geti frekar borgað sig?    Er ekki nær að hækka afnotagjöldin á hinum stöðvunum? Þetta er nú talsverð hækkun í kreppunni.  Það er varla hægt að seilast dýpra í vasana okkar.  Ég hef aldrei keypt áskrift að öðrum stöðvum en RUV. Játa að ég hef stolist til að horfa á doktor House á skjánum af og til. Horfi reyndar sáralítið á sjónvarp fyrir utan fréttir og fréttatengda þætti.

En ég vil hafa ríkissjónvarp og útvarp.

Mér finnst eitthvað vitlaust í þessu.

Gjald vegna RÚV verður 17.900

Villandi

............Mitt heimili hefur aldrei haft 165 þúsund á mann til að spila úr.  Það held ég að eigi við þúsundir annara heimila í landinu.  Enda heyrði ég bara um góðærið hjá stjórnmálamönnum.  Það snart ekki mig né mína fjölskyldu.  Þetta góðæri var álíka fjarlægt og tuglið.  En kreppan kemur af fullum þunga.

Ég held að framtíðarverkefni hér hljóti að verða að minnka þetta svakalega launabil sem orðið hefur i landinu síðustu ár.  Allt launakerfi er ónýtt hérna. Það er bara hlægilegt að sjá tölur um meðallaun. Hver eru meðallaun tveggja manna þar sem annar hefur 200 þús en hinn 2 milljónir?  Hvað réttlætir slíkan launamun? Hvað þarf einstaklingur  að hafa í laun að lágmarki til að lifa af? Er réttlætanlegt að borga svo lág laun að fólk rétt skrimti?  Fullorðnu fólki fyrir fulla vinnu. Þetta er búin að vera þjóðarskömm lengi.

Í raun þyrfti einhverja siðfræðinga til að fara yfir launamál hér.

Útgjöld heimila hækkuðu um 11%