Hvernig rata þeir?

Hvernig ratar björn að Bjarnarfelli og Bjarnarvötnum?  Og hvernig ratar hvalur að Hvalskoti? 

Hvalreki í Bakkafirði

Ég er ábyggilega vogmær

fædd í október.  Þó er ég ekki þunnvaxin og næ engan vegin þriggja metra lengd. Hef meira að segja komið við á Skagaströnd. En vissulega er ég sérstæð (einstæð...sjálfstæð). Svo mikið er víst að ég fæddist með tálknleifar sem voru fjarlægðar á unglingsárum. Þessar tálknleifar voru framan á hálsi. Þar var lítið gat þaðan sem rann vessi allt til að þetta var fjarlægt þegar ég var 16 ára gömul. Svona er ég nú komin skammt á þróunarbrautinni. Föðurbróðir minn og ömmusystir mín höfðu sama fæðingargalla. En ekki veit ég um fleiri.

En afmælisbarn dagsins er Atli Hreinsson bróðursonur minn....mikill rokkari. Til lukku með daginn

Vogmær finnst á Skagaströnd

Meeee meee

svona hljóta skilaboðin að líta út. Gaman að þessu.  Hvað er það með tengsl kinda sem er svona dularfullt. Ætli þær myndi gengi?  Eða stunda þær einelti?   Jarma þær saman á síðkvöldum? Ég mun ekki láta niðurstöður af þessum rannsóknum fara fram hjá mér ó nei.

Ærnar með gemsa og senda SMS

Íslenskir bændur geta margt lært af þeim bresku!!

Stolinn brandari

 Fyrirgefðu Sigrún þennan ritstuld. Mér finnst hann bara svo góður þessi. Prentaði hann út og límdi á dagbókina í vinnunni.

Kani lagðist á sjúkrahús og eftir nokkrar rannsóknir kom læknirinn að spjalla við hann.

" I am your Doctor. Sorry to inform you that you have a brain problem. Your brain is in two parts....left and right. The left part has nothing right in it and the right has nothing left in it.

Sjáið þið það sem ég sé?

skoðið myndina og látið vita ef þið sjáið eitthvað óeðlilegt í síma 112. Þetta er ekki tekið út á Skaga heldur í Garðabænum

Grunur leikur á miltisbrandi

1000 Bjarkir

Er það nú ekki fullmikið af þvi góða? En þetta er örugglega heimsmet í klónun og mun vekja mikla athygli og þá gleyma menn hvítabjarnadápunum.

   Ég spái því að hvítum hrossum muni snarfækka á landinu í sumar.

1.000 bjarkir fyrir Björk

Erica la Tour Eiffel

DV greinir frá því að gefin hafa verið saman við hátíðlega athöfn Erica fyrrverandi hermaður frá San Fransisco og Eiffelturninn í París. Þess er jafnframt getið að Erica hafi átt í ástarsambandi við grindverk.  Minnir á karlinn sem átti í kynferðislegu sambandi við hjólhest.   Hins vegar varð frúin sem giftist Berlínarmúrnum ekkja við fráfall hans.

Nú er ég farin að líta í kringum mig. Hvernig hljómar Frú Smáralind eða Frú Kringla??

Hvernig skiptast eigur við mögulegan skilnað?

Lögreglumál

 Ég legg hér með til að yfirvöld heimili innflutning villisvína. Þá væri hægt að fara sparlegar með piparúðann. Um helgar síðla nætur væri svo hreinlega hægt að tæma miðborgina á mettíma með  því að hleypa nokkrum stykkjum á göturnar. Svín á móti svíni.  Þau eru ódýr á fóðrum og gera ekki miklar kröfur í kjaramálum.  Og svo eru þau ágæt til átu. Þetta eru fjölnota kvikindi. Ég held svei mér þá að þau myndu leysa mikinn vanda.

Umsátur villisvína

Vitlaust talið.

...Eg hef lengi verið sannfærð um að Íslendingar eru miklu fleiri en gefið er upp opinberlega. Hafið þið tekið eftir þegar stóratburðir gerast erlendis er ALLTAF Íslendingur á staðnum til að lýsa atburðinum. Nú var kona í Burma þegar fellibylurinn reið yfir.   Ég man sérstaklega eftir jarðskjálftum í Tyrklandi fyrir nokkrum árum. Þá var að sjálfsögðu talað við Íslenska konu sem var á staðnum. Svo fór hún að bera skjálftana saman við skjálftann í Kobe í Japan....hún hafði nefnilega verið þar líka!!

Ef maður skreppur út fyrir landsteinana hittir maður Íslendinga á ótrúlegustu stöðum. Þeir eru bókstaflega allstaðar. Kona stoppaði mig í San Fransisco og bað mig um eld......á íslensku!!!

  Nú ef  skoðaðar eru verslanir á höfuðborgarsvæðinu sér hvert mannsbarn að þær hljóta að þjóna fleirum en 300þús hræðum.  Hér eru seldir fleiri jeppar en á Norðurlöndunum til samans....segir það ekkert um fjöldann sem hér býr?  Ég legg til að hér verði gert almennilegt manntal.